المقبلات بأنواعها بطريقة بسيطة وطعم لذيذ
مطبخ العائلة
شيف محمد بقشيش

أولا؛ حلقات البصل بحبة البركه
المقادير :
بصلتين ابيض حلقات / دقيق / نشا / ملح / فلفل / بابريكا / بيضه / شويه مايه / بقسماط عليه حبه البركه / زيت للقليه
الطريقه :
نحط المكونات على بعضها الدقيق والنشا والملح والفلفل والبابريكا والبيضه وشويه مايه ونقلب كله مع بعض يبقى عندنا زى عجينه سايله شويه
نحط فيها حلقات البصل ونطلعها على البقسماط بحبه البركه وبعدين ندخلها تلاجه شويه ونطلعها ونقليها فى زيت
وبالف هنااا

ثانيا ؛ اصابع جبنه موزاريلا بحبة البركه
المقادير :
جبنه موزاريلا مقطعه صوابع / دقيق / بيض / بقسماط / حبة البركه / فلفل اسود / زيت للقلي
الطريقه :
نغلف صوابع الجبنه بالدقيق وبعدين البيض ويكون عليه الفلفل الاسود
نكرر الخطوه دى مره كمان عشان تتغلف كويس ومن البيض هنحطها فى البقسماط ويكون عليه حبه البركه وندخلها التلاجه شويه ونقليها قبل الاكل على طوول
نقلى الجبنه فى زيت ويكون سخن وتاخد لون ونشلها على طول عشان متطلعش بره البقسماط وتتقدم مع الصوص المفضل ليكو
وباالف هنااا

ثالثا؛ ناتشو تشيز
المقادير :
كوبايتين دقيق دره / كوبايه مايه سخنه / جبنه موزاريلا / جبنه شرايح / قطع فراخ / تونه / زتون اسود / بابريكا حاره / صوص شطه / مسترده
الطريقه :
نعجن الدقيق مع المايه كويس اوى لحد ما العجينه تبقى مظبوطه ومش بتلزق
نقسم العجينه كور صغيره ونفرد كل واحده بالنشابه ونقطعها مثلثات
نقلى الناتشو فى زيت سخن لحد ما لونه يبقى كويس وبعدين نطلعه ونسيبه يبرد
نجهز الحشوات ممكن تبقى قطع فراخ صغيره مع زتون وجبنه موزاريلا وممكن تبقى تونه عليها شطه ومسترده وجبنه شرايح
نجيب الناتشو ونحط عليه قطعه جبنه وبعدين الحشوه وبعدين قطعه جبنه تانيه
نرصهم فى صنيه وندخلهم الفرن بس يادوب الجبنه تسيح ونرش عليهم البابريكا
( طبعا الحشوات على حسب الرغبه والجبن اى نوع جبنه بيسيح المفضل ليكو والبابريكا بردو على حسب الرغبه )
وبالف هنااا

رابعا؛ بطاطس محمره مبشوره
المقادير :
بطاطس مبشوره محمره / فلفل الوان مقطع صغير / بصل اخضر مقطع صغير / طماطم مكعبات صغيره / صوص جبنه جاهز / زيت للقلي
الطريقه :
هنبشر البطاطس ونحمرها فى زيت بس اهم حاجه منحطش كميه كبيره نحمر شويه شويه عشان كلها تستوى هتعمل زى القرص كده مشبك فى بعضه ممكن نخلى كده وممكن نفكه من بعضه على حسب الرغبه
نجهز كل المكونات الفلفل والبصل والطماطم والجبنه ونحطهم على البطاطس وممكن نعمل زى طبقات نحط شويه بطاطس بعدين المكونات وشويه جبنه ونكمل لحد ما الكميه تخلص
ممكن نعملها بالبطاطس الصوابع العاديه وممكن نعملها شيبسى
وبالف هناااا

خامسا؛ صوابع الجلاش بخلطة الحواوشى
المقادير :
جلاش / لحمه مفرومه / زبده سايحه / طماطم مقشره ومفرومه / فلفل رومى مفروم / بصل مفروم / ملح وفلفل اسود / توابل لحمه وتوابل مشكله / قرفه / بابريكا / شطه او فلفل اخضر حامى حسب الرغبه
الطريقه :
نحط اللحمه على النار لوحدها شويه صغيره ونكون مجهزين الخلطه بتاعتها الطماطم والفلفل الاخضر والبصل ونحط عليهم كل التوابل ونقلبها كويس
نضيف الخلطه على اللحمه المفرومه ونقلبها كويس ونسبها تكمل سوا
نفرد الجلاش ورقه ورقه وندهنها بفرشه زبده بسيطه ونحط فيها حشوه اللحمه ونلفها ونرصها فى صنيه مدهونه زبده او زيت ونعمل كله بنفس الطريقه وندخلها الفرن على 180 لحد ما تاخد لون ونطلعها نقدمها
(لذيذ وتغيير ونقدم معاه صوص مثلا او سلطة زبادى بتبقي حلوه مع الجلاش )
وبالف هناااا

سادسا؛عيش بالتوم والزعتر
سريع وبسيط وطعمه و ريحته تحفه جدا
المقادير :
عيش فينو مقطع حلقات او شرايح / زبده سايحه / تلت فصوص توم مفروم / زعتر
الطريقه:
بنقطع العيشوبعدين بنحط الزبده في طبق وعليها التوم المفروم والزعتر ونقلبهم كويس
وبالفرشاه ندهن العيش بخليط الزبده والتوم والزعتر وندخلهم الفرن ياخدو لون ونطلعه
وبالف هناا

سابعا؛شيبسي
المقادير:
واحده بطاطس /قطاعة البطاطس الشيبسي / توابل نكهات مختلفه / زيت للقلي
الطريقه:
نقشر البطاطس ونغسلها ونعملها بقطاعة الشيبسي لو هنسيب البطاطس مش هنقليها علي طول نحطها في مايه ونقطه خل لو هنقلي علي طول خلاص مش محتاجين ننقعها
يكون الزيت سخن ونحط الشيبسي واحده واحده لحد ما كله يبقي باين في طاسه الزيت يعني بلاش فوق بعضه عشان هيلزق ويبقي طري لازم كله يبقي بعيد عن بعض ويتقلي ونطلعه ونحط غيره لحد ما الكميه تخلص
اول ما يطلع نحط عليه توابل بالطعم الي تحبوه وهتبقي زي الجاهز واحسن واضمن اكيد وبالف هناااا