السلطات بطريقة سهله وبسيطة وباحلي وألذ طعم
مطبخ العائلة
شيف محمد بقشيش

أولا:سلطة الفاصوليا الخضرا بالعسل
المقادير:
ربع كيلو فاصوليا خضرا / صدور فراخ مكعبات مستويه/ بصل احمر شرايح / فلفل الوان شرايح / 5معالق خل كبيره / رشة ملح خفيفه / 3 معالق صغيرة عسل ابيض / فلفل اسود / مايه ساقعه / مايه عاديه / رشة جبنه للتزين
الطريقه:
نسلق الفاصوليا بسيط جدا يعني الافضل متغيرش لونها وتكون ناشفه شويه ونطلعها من المايه المغليه علي مايه سقعه
نجهز الفلفل الالوان والبصل الشرايح
والصوص :الخل علي العسل والملح والفلفل ونقلب كله مع بعضه
نحط المكونات علي بعضها الفاصوليا والفراخ والفلفل والبصل والصوص ونقلب كله حلو ندخلها التلاجه ونسبها لحد قبل الاكل ويفضل يكون كذا ساعه ونقدمها
(وممكن تتعمل من غير فراخ حسب الرغبه بس بالفراخ هتبقي وجبه كاملة ومفيده )
وبالف هنااا

ثانيا؛سلطة الحمص
المقادير:
حمص مسلوق / خس مقطع / بقدونس / فلفل الوان مقطع / كمون / رشه شطه / عصير لمونه
الطريقة:
ننقع الحمص من قبلها بيوم ونغسله كويس ونحطه في مايه مع رشه كمون علي النار ونسيبه لحد ما يستوي او بديل ممكن علبه حمص جاهزه
نقطع الفلفل الالوان والخس ونحطهم علي الحمص ونتبله بالكمون والشطه واللمون بيبقي حلوه وبتشبع جداومفيده طبعا
وبالف هنا

ثالثا؛سلطة مخللة
المقادير:
واحدة طماطم مقطعة / واحده فلفل رومي مقطع / واحده خيار / جزره مبشوره / بقدونس مخرط / فصين توم مفروم / كمون / رشه ملح بسيطه اوي / عصير لمونه / 4 معالق كبار مايه / معلقه صغيره خل
الطريقه:
نقطع كل المكونات كبير شويه عن السلطه العاديه
ونحط اللمون علي التوم والكمون والملح والمايه والخل ونقلب ونحطهم علي السلطه ونسبها في التلاجه نص ساعه قبل الاكل ونطلعها نقدمها
وبالف هناا

رابعا:سلطة الجرجير بالتفاح الاخضر
المقادير:
جرجير / تفاح اخضر شرايح / عين جمل / فراخ مستويه ومقطعه / نص عصير لمونه / مسترده / عسل ابيض / فلفل اسود
الطريقه:
نجهز الصوص نحط العسل والمسترده وعصير اللمونه والفلفل الاسود ونقلب كله مع بعضه كويس
في طبق التقديم نقطع الجرجير قطع كبيره وعليه التفاح شرايح والفراخ وعين الجمل ونحط عليهم الصوص ونقدمها
وبالف هنا

خامسا؛ سلطة خضار بالباربكيو والعسل
المقادير:
كوسه / جزر / فلفل الوان / خس / جرجير/ صدور فراخ ومتقطعه / باربكيو صوص / عسل ابيض / مسترده / معلقه زيت زيتون
الطريقه:
نقطع كله شرايح ونشوح الكوسه والجزر في معلقه زيت الزيتون
نجهز الصوص نحط الباربكيو علي العسل علي المسترده ونقلبهم كويس
في طبق التقديم نحط الخس والجرجير وشويه صوص وبعدين نكمل الباقي الفلفل الالوان والفراخ والكوسه والجزر وباقي الصوص ونقدمها
وبالف هناا

سادسا؛سلطة الجرجير بالحمص
المقادير:
جرجير / علبه حمص / فجل احمر مقطع / فلفل الوان شرايح / جزره مبشوره / مشروم / مسترده وعسل وفلفل اسود
الطريقه:
نجهز الصوص المسترده عليها معلقه عسل وفلفل اسود
في طبق التقديم نحط الجرجير وبعدين شويه حمص وفجل ومشروم وفلفل الوان وشويه من الصوص ونعمل طبقه تانيه نفس المكونات وباقي الصوص في الاخر ونقدمها
( ممكن نحط مايونيز مع الصوص بس كده مفيده اكتر )
وبالف هناا

سابعا؛ سلطة الفتوش بدبس الرمان
المقادير :
اتنين طماطم / خياره / فلفل رومى / جزر / كابوتشا او خس / بصله / رمانه / عيش شامى محمص / لمونه / ملح / خل / زيت زيتون/ سكر / دبس رمان / ورقتين نعناع اخضر
الطريقه :
نقطع المكونات الطماطم والخيار والفلفل والجزر والخس والنعناع والبصله ونحط كله على بعضه ونفرط الرمانه ونحطها عليهم والتقطيع يكون كبير شويه
نفتح العيش الشامى ونقطعه مكعبات ونحمصه كويس
فى طبق تانى نحط عصير اللمونه مع رشه ملح ورشه سكر وزيت وخل ومعلقتين كبار دبس رمان ونقلب كويس وبعدين نحطهم على المكونات اللى قطعنها ونقلب كله و على الوش نحط العيش الشامى وشويه كمان دبس رمان
( في المطاعم بيقلو العيش في الزيت بس بنحمصه في الفرن احسن طبعا بيبقي محمص ومقرمش )
وبالف هنااا

ثامنا؛سلطة الكابوتشا بالفراخ والبطاطس الودجيز
السلطه دى وجبة جميله جدااا وبتشبع ومش محتاجه اى حاجه جنبهاوممكن نزود الفراخ والبطاطس شويه ويبقى احلي وألذ وجبة
المقادير :
كابوتشا مقطعه شرايح / صدور فراخ مستويه مقطعه شرايح / بطاطس ودجيز مقطعه مكعبات / مشروم / فلفل الوان مقطع شرايح / جزر مبشور / دره حلوه / جبنه شيدر مبشوره / عصير لمونه
الطريقه :
نتبل صدور الفراخ بالملح والفلفل وتوابل مشكله وبابريكا وزعتر وقرفه وتوابل فراخ ورشه جنزبيل ونسويها كويس ونقطعهاشرايح وممكن تسويها باى طريقه تانيه تحبيها
نحط كله على بعض الكابوتشا والفلفل الالوان والمشروم والجزر والدره والبطاطس الودجيز والفراخ والجبنه وعصير اللمون ونقلب كله ونقدمها
وبالف هناااا

تاسعا؛سلطة الخس بالفراخ
الطعم حلو اووي وتغييير ومفيده وتنفع وجبة لوحدها
المقادير:
خس مقطع / كرنب سلطة مقطع رفيع / فلفل رومي شرايح / جزره مبشوره / حمص / معلقة عسل ابيض صغيره / صدور فراخ مقطعه مكعبات / ملح / فلفل اسود / بابريكا / معلقة مسترده كبيره / معلقتين باربيكيو صوص كبيره / صوص شطه حسب الرغبه / شويه مايه صغيره / تلت حبات عين جمل مكسر
الطريقة:
نحط الفراخ تستوي ربع ساعه وبعدين نحط عليها الملح والفلفل والبابريكا ونسبها عشر دقايق وبعدين نضيف شويه مايه صغيره والمسترده والعسل والباربيكيو والشطه ونقلب كويس لحد ما يبقي في صوص حلو فيها
ونكون مجهزين الخس والكرنب والجزر والفلفل الرومي علي بعض والحمص ونحط عليهم صوص الفراخ ونقلب حلو وبعدين نحط الكميه كلها والفراخ كلها وعلي الوش عين الجمل ونقدمها
وبالف هناااا
هنكمل باقي السلطات تابعوناااااا