هنكمل باقي وصفات السلطات لذيذة وسهله وكمان مفيدة من مطبخ العائلة
شيف محمد بقشيش

أولا؛سلطة البنجر والجزر
المقادير :
تلت بنجرات / جزرتين / ملح / كمون/ معلقه صغيره خل / معلقة صغيره زيت / نص عصير لمونه / فصين توم مفروم
الطريقه :
نغسل البنجر كويس ونضفه بالسكينه ونسيبه بقشره ونقشر الجزر ونغسله ونحطهم فى مايه على النار لحد مايغلو وبعدين نوطى النار عشان يستوى
بعد شويه نشوفهم بالشوكه الجزر هيستوى قبل البنجر نطلعه من المايه ونسيب البنجر يكمل سوا
بعد كده نطلع البنجر ونقشره ونقطعه حلقات والجزر بردو نقطعه حلقات ومن المايه اللى استوا فيها البنجر والجزر هناخد كوبايه تقريبا نحط فيها الملح والكمون والخل والزيت والتوم واللمون ونقلبها كويس ونحطها على البنجر والجزر وياريت يبقى فى بولا ازاز وتكون المايه مغطيه البنجر كله ونسيبه شويه ونطلعه فى طبق وقت الاكل علي قد الاكله ونسيب الباقى فى نفس المايه ونحطه في التلاجه
وبالف هناا

ثانيا؛ طماطم مخلله :
المقادير :
طماطم / توم مفروم / كمون / معلقه خل صغيره / رشة ملح صغيره اوى / نص عصير لمونه
الطريقه :
نقطع الطماطم حلقات بس مش للآخر
نحط المكونات على بعض التوم والملح والكمون والخل وعصير اللمون ونقلب كويس ونحطها على طماطم وبين الحلقات ونسبها شويه وبعدين نقدمها وبالف هنااا

ثالثا: سلطة اللوبيا
المقادير:
لوبيا منقوعه ومسلوقه / كسبرة خضرا مقطعه/ طماطم مقطعه صغير / فلفل رومى مقطع صغير / بصل اخضر / رشه ملح / نص عصير لونه / كمون / زيت زيتون/ معلقه خل صغيره
الطريقه :
نحط اللوبيا على الطماطم والفلفل والبصل الاخضر والكسبرة الخضرا ونقلب
والملح واللمون والكمون والخل وزيت الزيتون على بعض ونقلبهم كويس ونحطهم على اللوبيا ونقلب كله مع بعضه
وبالف هناا

رابعا؛ سلطة الزبادى
المقادير :
علبه زبادى / خياره مبشوره / فصين توم مفروم / رشة ملح / رشة فلفل / رشة كمون / رشة بابريكا
الطريقه :
نحط كله على بعضه الزبادى والخيار والتوم والملح والفلفل والكمون والبابريكا ونقلب كويس
ونقدمها
( ممكن نحط عليها رشه نعناع ناشف حسب الرغبه ، وممكن نعمل الخياره والتوم فى الكبه ضربه بسيطه )
وبالف هنااا

خامسا؛سلطة الجرجير بالعنب وصوص الريكفورد
المقادير :
جرجير / سوسيس مسلوق ومقطع حلقات / عنب احمر واصفر / مايونيز / جبنه ريكفورد / صويا صوص / خل تفاح / صوص شطه / نص عصير لمونه / نص معلقه صغيره عسل ابيض
الطريقه :
نجهز الصوص نحط المايونيز على الجبنه والخل واللمون ونقلب كويس لحد ما الجبنه تفك وبعدين نضيف الباقى صويا صوص والشطه والعسل ونقلب كله كويس اوى
فى طبق التقديم نحط الجرجير وعليه السوسيس والعنب وشويه من الصوص ونعمل طبقه تانيه جرجير وسوسيس وعنب وباقي الصوص ونقدمها
(ممكن نعملها بالفراخ هتبقى احلى كمان يعني على حسب كل واحد بيحب ايه اكتر )
وبالف هنااا

سادسا ؛سلطة الجرجير بالرمان
المقادير :
جرجير /فراخ مقطعه ومستويه / دبس رمان / نص عصير لمونه / مايونيز / كاتشب / رمانه مفرطه
الطريقه :
نجهز الصوص نحط دبس الرمان على المايونيز والكاتشب وعصير اللمونه ونقلبهم كويس
فى طبق التقديم نحط شويه من الجرجير عليهم شويه من الفراخ والرمان المفرط وعليهم شويه من الصوص وبعدين نعمل طبقه تانيه بردو جرجير وفراخ ورمان وبعدين الصوص
وبالف هناااااا

سابعا؛سلطه الجرجير بالفراخ
المقادير :
صدور فراخ شرايح مستويه / لانشون فراخ ولحمه مقطع/
زتون اسود شرايح / جرجير / معلقه كبيره زيت زتون / فصين توم مفروم / معلقه كبيره مسترده / معلقه كبيره مايونيز / معلقه كبيره طحينه / عصير لمونه / معلقه كبيره خل تفاح / معلقه كبيره زبادى / معلقه صغيره عسل ابيض / معلقه كبيره كاتشب / شويه مايه صغيرين اوى
الطريقه :
هنعمل الصوص هنحط التوم والزيت ومسترده ومايونيز وطحينه وعصير اللمونه وخل التفاح والزبادى والعسل والكاتشب كله على بعضه ونقلبهم كويس اوى
الفراخ الموجوده عندنا هنقطعها شرايح ونحطها فى طاسه ونقطع عليها اللانشون والزتون وشويه من الصوص اللى جهزنا مع شويه المايه الصغيرين ونقلب كله ونسبهم شويه على النار بس مجرد يختلطو مع بعض لان الفراخ مستويه اصلا
فى طبق التقديم هنحط شويه من الجرجير وعليهم شويه صوص وجزء من الفراخ ونعمل طبقه تانيه جرجير وبعدين صوص وبعدين باقى الفراخ وفى الاخر خالص باقى الصوص وبتتقدم بتكون دافيه شويه او بارده زى ماتحبو
(طعمهااا راااائع وممكن طبعا تزودو حاجات تانيه زى عيش مكعبات محمص او مكسرات مثلا عين جمل )
وبالف هنااا

ثامنا؛سلطة المكرونه بالزبيب
المقادير :
كيس مكرونه / كاتشب / مايونيز/ ملح وفلفل اسود / معلقه كبيره جبنه كريمي/ زبيب
الطريقه :
نسلق المكرونه نحط عليها شويه ملح وزيت لحد ماتستوى ونصفيها ونسبها تبرد
فى طبق نحط المايونيز على الكاتشب والملح والفلفل والجبنه والزبيب ونقلب كله مع بعض وبعدين نحطهم على المكرونه ونقلبهم كويس
نسبها شويه عشان كله يختلط ببعضه ونقدمها
وبالف هنااا