ايلى ..بان ... وايلى مابانش 
بصوا يا معلمين . باصبح وامسى عليكوا احلاا رجالة بالصلاة ع النبى .ولا فشخرة ولا نأورة وايلى هايسمعنا يقعد ادام . وايلى هايخنوقنا يرجع ورا . يا نتناقش بموضوعية . ياما تاخد نفسك ومع حالك وتروح المندرة 
المعلم محمد رمضان دة . نتاج مرحلة .نتاج فكر وتربية وتكوين نفسى وعقلى ووجدانى فرضتة الايام والمواقف والتعليم والتجارب وأسلوب الحياة . 
عيل زى دة . اتفرج على صورة زمان واتفرجوا على شكلة زمان وسكنة وشغل أمة وأخوة . اترما ف كل استوديو شوية . طبطب واتحايل وعمل فيها غلبان ومسكين . لحد ما ملك زمام أمورة والفلوس جريت ف ايدة والكل بيجرى وراة . وعمل فلوس ما عملهاش ناس عندهم سبعين سنة . نفس التشكيلة والتكوين دة والظروف دى بتمر بشباب كتير جدا فى مجالات مختلفة وأعمال مختلفة .يعنى مثلاا هات بعض الشباب ايلى نشعت على الحيطة السياسية . ناس مشيوا مع بعض طريق واتفقوا وفجاءة واحد يطلع منهم يبيع الكل علشان ينول الرضا ونالة .
واحد تلاقية يسارى بيحارب الدنيا كلها وعمال يهبد يمين وشمال ويشتم ف النواب ويقولك انا النائب الحقيقى للدائرة وفجاءة وبقدرة قادر تلاقية بيشتغل خدام عند النائب ويقولك العيال تقدر . واحد بعملك فيها الواد الثورجى ايلى هايحرك بلد بحالها وانة بيدافع عن حقوق الغلابة يا عينى والمساكين ياروح ماما . وفجاءة تلاقية بياكل وبيشرب وبيقبض ومتصور .. من عند النائب . شباب بتمر بمرحلة قسما بالله ممكن يبيعوا لامؤخذا يعنى !!!!!! علشان يوصلوا لهدفهم . 
لية بتلوموا محمد رمضان على غرورة ؟ فى وقت العيل بيبيع أبوة ب اتنين جنية ؟ 
اية تلوموا عيل زى محمد رمضان وانتوا وسطكم شباب يبيعوا اغلى ما يملكوا علشان المصلحة ؟ 
لية بتلوموا رمضان وانتوا وسطكم شباب بتتحول لعبدة شيطان علشان القرشين والكيف ؟ 
هى البلطجة ما كانتش موجودة قبل ظهور محمد رمضان ؟ 
هو السلاح والسنج والمطاوى والسافوريا والعشورة والفرد والمقروطة والغدارة والخمسات والالى ماكانوش اتصنعوا قبل ظهور رمضان ؟ 
هو طقم الحجارة والبافرة والرزلة والبانجوا والافيون والحشيش والماكس وأبو صليبة والفراولة وما شابة ما ظهروش قبل رمضان ؟ 
نرجع بقى للأسماء 
ش ش ش . شقاوة شباب شبرا كانت قبل ما يتولد محمد رمضان وابوة !! 
بلد القنبلة ......
معروفة قبل ما تتولد عائلة محمد رمضان 
. البقعة الحمرا ... يعنى الدرب الاحمر 
وشقاوة الدرب الاحمر 
موجودة قبل جد محمد رمضان 
الحسينية وباب الشعرية يعنى الشقاوة كلها وفتوات بلدنا .. موجودين قبل جدة محمد رمضان ما تتخطب .. 
الصعيد ورجالة الصعيد يعنى الخط والمطاريد . والناس ايلى بتولع بلاد علشان جاموسة كلت عودين برسيم من الغيط ايلى جنبهم ... والتار ولهيب النار 
يعنى عرب سينا وعرب العريش وعرب الفيوم وعرب اسكندرية وايلى يعدى لازم بالادب يهدى 
يعنى اية ولا اية ولا اية !!!!! 
مش معنى كلامى دة انى متفق مع محمد رمضان ولا موافق علية لكن . فى كل مناحي حياتنا فى الف محمد رمضان . فى كل مناحي أعمالنا فى الف سبكى . دة نسيج مجتمع اتشكلت قماشتة كدة . والترزى فصلها كدة . واحنا جيل بعد جيل بنلبس نفس القماشة . لكن بالوان مختلفة ومقاسات مختلفة . الفرق الوحيد أن لون ونوع القماش زمان ماكنش باين ولا ظاهر . دلوقتى فى الزمن الاغبر . معانا ايلى بأن وايلى مابانش