لكل أنثى .. مقال بعنوان ”طموحك هو ذاتك”

كتب ربيعة المالكى 9:22 م | الخميس 01 مارس 2018 342

أجدادنا وإحنا صغيرين كنا بنسمعهم بيرددوا بعض الأمثال واحنا نسمع ، بس مش فاهمين ، يعني أيه ده ، وأيه علاقته بالواقع بس لما كبرنا لقينا إن الأمثال دي ، لما فهمناها طبعا ، إنها ترجمة حقيقية للواقع وإنها تجميع لخبرات ناس سبقونا ، وإن الأمثال دي في الغالب بتكون صح ولو طبقناها هتوفر كتير قوي علينا ، فعلى سبيل المثال المثل اللي بيقول " قاعدة الخزانة ولا جواز الندامة "

مثل متفصل على البنات اللي احيانا كثيرة بيقبلوا على الزواج من أي شخص والسلام لمجرد أنهم لازم يتجوزوا .. حقيقي بحترم المثل ده جدا وبرفعله القبعة بس بحترم اكتر اللي بيعملوا به ..

إوعى تتجوزي لمجرد انك تتخلصي من نظرة مجتمع مريض ولا من كلمة ظالمة ومستبدة زي كلمة عانس اللي هي أحد الأسلحة الفاسدة لسلب حق من حقوق المرأة في انتقاء من يشاركها حياتها ، حياتها هي مش حياة حد تاني أو لأنها عايزة تتخلص من اهل جبارين ومستبدين أو لأنها عايزة حد يعولها ويصرف عليها أو أو أو لو بصينا بشكل أعمق هنلاقي كمجتمع أن المرأة دي مش مجرد فرد في مجتمع دي أسرة وأسرة يعني مجتمع

فإدوها الفرصة في إختيار أول فرد في تكوين مجتمعها ( أسرتها ) بصورة سليمة وتختار حد صح حد قادر حد واعي حد يعرف ويقدر معنى المسئولية علشان دي أول خطوة في بناء المجتمع .. والبنت اللي عايزة تتجوز علشان حد يصرف عليها طب ما تشتغلي انتي وتصرفي على نفسك بدل ما تتجوزي واحد الله اعلم به وهو اللي يشغلك وياخد فلوسك زي ما بنشوف أمثلة من دي كتير في المجتمع .. اوعي تُجبري على شئ انتى مش عايزاه او تصلحي غلط بغلط أفظع

إصمدي وكافحى وواجهي مشاكلك وماتخفيش من شئ ولا من حد وخليكي قوية وإحسبي خطواتك كويس خطوة بخطوة قبل ماتخطيها وفكري في العواقب والنتائج قبل أي قرار وابني نفسك وماتتكليش على حد من بعد ربنا غير نفسك ، واحصري قدراتك وشوفي نفسك من خلالها في مكانة أحسن وحاولي توصلي للمكانة دي وهتوصليلها .. وكلمة أخيرة ماتخليش طموحك راجل .