كل يوم بنقابل شخصيات جديده في حياتنا بس مش كل الناس اللي بنقابلها بتبقي فاهمة ان الحياه قصيره اووي علي كم الصدام اللي في واقعها.. ده غير انك للأسف كل ما تحتك بالناس اكتر.. كل ما بتلاقي نفسك قدام صنفيين من البش

ناس عايشه جوه الدنيا وشاربه منهجها وناس تانيه بره الدنيا اصلا.. اول صنف من الناس اللي عايشه جوه واقع الحياه بتلاقيها شايله هموم كتييييييييير جدا علي كتافها ومسؤليات ملهاش اول من آخر وده بتكتشفه متأخر اوووي لأنك ما بتشوفش غير وش مليان بالسماحه والحب والضحكه ما بتفارقش وشوهم ابدا

 الصنف التاني بقي طوول الوقت عايش دور الضحية ممثل شاطر جدا اكبر همه ان لما يكون نفسه في حاجه يعملها ومش مهم الحاجه دي هتبقي ازاي وعلي حساب مين.. او حتي ممكن يخسر من وراها مين او يكسب مين. المهم إشباع المعده الداخلية للأنا جوه ذاته.. وفي كل الأحوال.. الناس عايشه مع بعضها اللي جوه الدنيا بيهون علي اللي عايش بره واقعها..

 لك ان تتخيل الناس البسيطة دي اللي شايله جبال مسؤليات وهي بتضحك وبالنسبالها ده الطبيعي ولما يحزنوا شويه يرجعوا يلوموا ويقنعوا نفسهم انهم احسن من غيرهم ...هما بردوا نفس الناس اللي بتهون علي قلوب وعقول فارغه همومها المهوله واللي اشرس هم فيهم ممكن يبقي رفاهية كبيرة لغيرنا بتسمع منك همك وتهون عليك

وهي مش عارفه تقولك انك في نعمه كبيره.. الناس اللي بره الدنيا ما بيشغلش تفكيرها غير تفكيرها.. واللي جوه الدنيا هما اللي عدي عقلهم مراحل التفكير في مشاكلها.. كل اللي بيعملوا صمت رهيب عن الضغوط وباصين بس لقدام مكملين ومش عارفين هما ازاي مكملين لكن عارفين ان بيهم من غيرهم المركب هتسير.. عارفين بيكسبوا مين ويخسروا مين..

كل يوم بيكبروا في نظر نفسهم وصعبان عليهم وجعهم المكتوم بس بيرجعوا يقولوا دي دنيا ومش هتدوم.. واللي ناسي اننا عايشيين معاه علي نفس الكوكب.. لسه بيندب حظه المكركب.. هو في وادي واحنا في وادي.. عقله طاير بشويه مظاهر... وناسي انو بيرجع ينام تحت سقف وحواليه حيطان وممكن يكون قصر بجناين والعشه حلم لفقير مش باين.. توهه وزحمه وعك كتييير

تفاصيل داخله في زمامير والكل زايط..مولد بره ومولد جوه.. وآخر الليل شاهد ويوم القيامة عالميزان هيكون محايد ...هتحكي عيونوا عالناس اللي اتدارت... اللي ورا خيبته واللي ورا حيرته.. واللي ولا يهمه والكل هيتحاسب... لا بره الدنيا نااافع ولا جوه الدنيا شاااافع... العدل سيد الأدله والحكم في ايد رب واحد... الإحساس بالناس نعمه.. والرحمه في القلوب نور في عز الضلمه... راجع نفسك وشوف الناس بقلبك.

وركز علي قلوبهم وسيب وشوشهم دي في الآخر ما هي مجرد آله بيرسموا عليها ضحكه مكاره... والمجد لعزيز النفس ابو ابتسامه جباره... قادر رغم كل الكسر يجبر بقلوب حيرانه.... وبره الدنيا تعابين محتاره...