تداولة كثير من الصفحات علي موقع التواصل الاجتماعي الفيس بوك هذه الكلامات المنقوله من صفحة الكابتن محمد زايد عصب البطل الدولي في كمال الاجسام والحاصل علي العديد من البطولات العالميه التي تحث علي النجاح والكفاح للوصول لي أهدافك الحياه وكان نص الكلام كالآتي

كتير من الشباب محبطين و شايفين ان النجاح صعب في ظل الظروف الحاليه ولكن نجاحك اختيارك لوحدك ومحدش هيساعدك فيه ، طريقك ضلمة وفاضي ومحدش هينورهولك ، ابدأ ٢٠١٨ بفكرة جديدة وحماس جديد وشيل سقف احلامك ، طيب نعمل ايه
١- لازم يكون عندك حلم مش بس يكون حلمك فلوس 
٢- أغلب الأحلام بتحتاج فلوس فلازم تشتغل عشان يبقى معاك فلوس
٣- حاول تشتغل أي شغل في مكان يقربك من حلمك يعني في نفس المجال أو مجال قريب منه عشان متبعدش عن هدفك 
٤- لازم تعرف ان ال٨ ساعات بتاعة أغلب الشغلانات متنفعكش ، لإنك بكده هتبقى زي كل الناس فمتستناش نتيجة مختلفة عن الناس فاشتغل على قد متقدر عشان تحقق حلمك 
٥- اشتغل أحسن من أي حد جنبك عشان تقدر توصل لهدفك ، حتى لو مبتحبش شغلك أوعى تنسى ده طريقك لحلمك ولازم تتعب وتعمل أي حاجة عشان لو مش بتحبها عشان تحقق هدفك حتى في أمريكا وأوروبا الشباب بيشتغل في مطاعم وأي شغلانة عشان يصرف على تعليمه 
٦- كل فتره راجع نفسك وشوف انت ماشي في طريق صح ولا أنت تهت 
٧- متسمعش كلام حد يحبطك حتى لو أقرب الناس ليك لإن اللي بيحبطك مش مؤمن بيك ، إيمانك بنفسك ده مينفعش يتهز بكلام الناس
٨- اتفرج وتابع وثقف نفسك في الناس الناجحين في المجال اللي نفسك تنجح فيه عشان تعرف ايه المقومات اللي ناقصاك ولازم تبقى فيك 
٩- طور نفسك دايماً عشان ، لو عايز تبقى رياضى مثلاً تطورك تمرين ، لو عايز تبقى دكتور فالمذاكرة والتدريب مع دكاتره كبار هي تطورك وهكذا 
١٠- استمتع بنجاحتك حتى لو صغيرة وحس انك بتقرب من حلمك عشان تجدد طاقتك و يفضل جواك طاقة تكمل الطريق