زمان..كنا بنستني شهر رمضان.. شهر الصلاة والصوم وغض البصر والكلمة الطيبة صدقة وحالووو.. يا حالوو ؛ كان زمن جميل كله قيم واخلاق؛وكنا بنتلم عشان مسلسل وفزورة واعلان وكنا دايما متعودين ان المسلسلات بتجمعنا صغير وكبير و..الصغير قبل الكبير كلها كانت برامج ومسلسلات هادفة ومحترمة واجتماعية وعائلية كان اهالينا هما اللى بينادوا عليناعلشان نلحق تتر المسلسل باغنيته الجميلة اوالبرنامج من اوله هى دى الدراما المصريه وهو ده رمضان اللى كنا نعرفه !!! وسنه ورا سنه ورمضان ورا رمضان والدراما المصرية بتتغير بس للاسف للاسوء وصلنا لدرجة ان بعد ما اصبحنا احنا اهالى وبعد ماكان اهالينا بيندهوا علينا نلحق المسلسل او البرنامج بقينا نستني مقدمة المسلسل علشان نشوف هاينفع ننده على اولادنا والا نقولهم ادخلوا ومحدش يتفرج بعد ما تسمح لنا الدراما المصريه بالاعمار اللى ممكن تتفرج عليها؛؛ الجديد ان بقى فى موضة (+ 12) و(+16 )و(+18) واللى من المفترض لما نشوفها ندخل اولادنا يناموا او ميتفرجوش طب ازى؟ ولما يدخلوا اوضتهم مفيش تليفزيون ؟مفيش ديش؟ ..ولو مفيش؟؟ نسينا ان فيه انترنت واندريود وموبايلات اللى اصبحت للاسف وسيله اسهل وافضل من التليفزيون للهروب من كم الاعلانات البشعة اللى القنوات بتسعى للتربح من خلالها.. للاسف وصلنا لمرحله استهتار واستخفاف بالعقول واسفاف وقلة احترام وقله ادب وصلنا لمرحلة التييييت بقينا نسمع تييييييت اكتر مابنسمع الحوار نفسه وليه موضه (+18) عشان شوية الفاظ فظه والا مناظرخليعه والا حركات غريبه بالاضافة الى استعراض معظم الفنانات وبالاخص الوجوه الجديدة باجسامهم وحركاتهم الجنسيه والا يمكن ده اجتهاد بزياده عشان اللي عامله دور السنة دى تعمل تلات ..اربع ادوار السنة الجاية ويبقى زودنا الطينة بله وللاسف كله ملهوش علاقه بالموضوع ولا حتى فى سياق الدور وده كله علشان كل القائمين على الموضوع بداية من المنتج الى الممثل و القنوات لا يهمهم الا المكسب المادى والتربح فقط و نسوا ان اولادهم من المتفرجين والله اللي الواحد بيشوفه فى التليفزيون من عري ولبس ضيق ومسخرة ..عمر المتفرج ما بيشوفه فى الشارع ؛ومحدش يقول ان فيه المناظر دى ؛اصبحنا ولو كأننا بنعرض بورنو دراما ولو تطرقنا الى الالفاظ خد عندك ؛الفاظ مسيئة و ايحائية ومستفزة وشتائم لا تليق بشهر رمضان الكريم..فين الرقابه؟؟ والا دى كمان تبرر ب موضة ال (+) الظاهرة على الشاشة ويا ريت محدش يرد على ويقول معاك ريموت "الجمله اللي اصبحت بتتكرر كتيير" لان للاسف جربت احول بالريموت فعلا وللاسف لقيت الاسوء بكتير؛ رايحة بينا على فين يادراما بقينا فى زمن التييييت ..تيييييييت