كل يغنى على ليلاه
الناس زعلانه اوى على حال البلد والاسعار لكن الزعل طبقات ومراحل
ناس زعلانه على سعر تذكرة الطياره واسعار العقارات والعربيات والدهب اللى ولع نار
وناس زعلانه على سعر كيلو اللحمه والفراخ والسمك ومشغولين بمقاطعة الجزار
 وناس زعلانه على سعر الباذنجان وكيلو البطاطس وسعر الطماطم اللى اتجننت والطعميه اللى القرص منها بقى بنص جنيه
كلهم زعلانيين ..لكن مين بقى اللى زعلهم ملئ السمع والبصر وزعلهم عالسوشيال ميديا بكل انواعها 
ساخطين ومش راضيين 
اكيد مش بتوع الطماطم والطعميه مع ان همهم اكبر بكتير من بتوع تذاكر الطيران
بتوع الباذنجان زعلانيين 
بس راضيين ومستحمليين
بتوع الباذنجان يمكن يكونوا مابقوش لاقيين 
بس حاجه غريبه دايما عالبلد خايفيين 
وكل ماتضيق عليهم يدعوا لنفسهم ولكل المصريين
زمان قالوها حكمه ...اصلها مابتهونش غير على الغلبان
 حتى اللقمه بتهون عليه