.في البداية كلمينا عن بدايتك مع شغل الهاند ميد متى و كيف بدأ .. و رحلتك الفنية حتي انتهت بعالم الاكسسوار و عقد نول الخرز ..؟

بديت من عمر 6 سنوات بالرسم والتلوين وعمل مجسمات بالفوم والكرتون ولما اسرتى اكتشفوا موهبتى ساعدونى و وفرولى كل الخامات فتدرجت من الرسم على الورق للزجاج وعملت فازات وتابلوهات وبعدها الرسم على القماش وعملت تيشرتات وبعدها تعلمت شغل الجلود وعملت محافظ واحزمة وشنط وبعدها اشتغلت فى تنسيق الزهور وكنت بعمل احلى البوكيهات بمختلف الاشكال وكل دا بفضل تشجيع اسرتى كانو بيوفرولى الخامات وكنت باشترك فى معارض من وانا فى سن الثانوى وببيع شغلى وكنت ببيع لاصدقائنا واقاربنا ودى كانت اكتر حاجة بتبسطنى وقتها ، وبعد ما تخرجت من الجامعة واشتغلت اتعلمت اعمل تابلوهات كانفا وسيرما كبيرة وعلى اعلى مستوى واخر مرحلة وصلتلها كانت الاكسسوارات وبدأت بموديلات بسيطة وبعدها تطورت للشغل بالاحجار القيمة وشغل النحاس وتشكيله لدرجة انى كمان عملت تطريز لظهر سرير بالاحجار والخرز والسيرما الى ان وصلت الى مرحلة نول الخرز واللى اعطتنى شهرة كبيرة لانها بتتميز بالدقة والصعوبة الشديدة محتحة مجهود وتركيز وصبر واتقان .
بما انك حائرة بين الطب و الهاند ميد ... في الأساس كنتي بتحلمي تكوني ايه و انتي طفله ؟
وانا صغيرة قوى كنت عاوزة اطلع مدرسة كنت بحب قوى الكتابة بالطباشير وبحب الميسات بتوع الفصل . لما كبرت ومارست شغل الهاند ميد اتمنين اكون رسامة او مهندسة ديكور ، ولكن بما انى كنت متفوقة دائما فى دراستى فكانت اسرتى تشجعنى ان تكون مجرد هواية بجانب عملى الاساسي فتمنيت الصيدلة وان تكون الفن محرد هواية

ليه ما دخلتيش فنون جميله .. ؟ عشان صيدلة أضمن ؟
اه فعلا ده حقيقى انا كنت من محافظة بعيد عن الكلية واهلى مكانوش عاوزنى اتغرب وفى نفس الوقت يبقى حاجة ليها مستقبل مضمون .

بعد ما بقيتي صاحبة تجارب ما بين الطب و الفن و رجع بيكي الزمان للوراء هتدخلي صيدلة و لا فنون جميلة ،؟
صراحة فنون جميلة لانها الحاجة اللى بحبها فعلا رغم ان اسرتى كان معاهم حق و على فكرة السؤال ده صعب انا نفسي بتردد فى اجابته كتير ولو فكرت بعقلى هاقول صيدلة ، لكن لو قولت لي اللى كنتى تتمنيه هاقول فنون جميلة .

ايه أول موقف حصل لك حسيتي فيه انك بقيتي مصممة اكسسوار محترفه ؟
اول موقف حسسنى انى بقيت محترفة لما نفذت اول عقد بنول الخرز باتقان وكانت عقد صعب جدا وكان فيه تحدى لنفسي وكان وش السعد عليا و اتعرفت جدا بسببه ومن بعدها اتشهرت انا بحب اى حاجة فيها فن وهاند ميد فى الدنيا ببقى عاوزة اعمل كل حاجة .

كلميني عن حاجه جديدة بتحبي تعمليها بعيدا عن الصيدلة و تصميم الاكسسوار .؟

عاجبنى قوى شغل الديكوباج والرسم على الخشب والموبيليا ونفسي قوى اعمل افكار كتيرة . و انا عن نفسي باحب الرسم قوى وبعرف ارسم زخارف فنفسي ادخل ده فى الرسم على الاخشاب والجدران .

مين اول شخص اكتشف موهبتك ؟

اول شخص اكتشف موهبتى هى والدتى وهى اكتر واحدة شجعتنى وكانت بتاخد شغلى تفرجه لاصحابها وهى فخورة بيا‏

ماهو دور الأسرة في مشوار نجاحك ابتداءا من والديكي و انتهاءا بزوجك ؟
الاسرة اهم شئ لانهم هم اللى دعمونى والدى ووالدتى شجعونى وكانو بيشترولى الخامات اللى بحتاجها وبيسيبونى افنن براحتى طول فترة الاجازة ويسيبونى اشترك فى المعارض وكانو ينزلو معايا القاهرة فى الازهر عشان نشترى خامات ويتعبو عشانى‏

 ‏وزوجى صيدلى وشخصية عملية وبيحب شغله جدا ومهتم بالصيدليية لكن رغم كدا بيسيبنى اشتغل براحتى وامارس هوايتى وابيع على النت جنب شغلى فى الصيدلية ودى حاجة انا بقدره واحترمه فيها جدا.

امتي بدأتي تعتمدي على نفسك ؟
كنت بنزل معارض وانا فى سن الثانوى والجامعة اما الان فباكتفى بتسويق شغلى على الانترنت و احب اضيف ان الانترنت مهم جدا فى التسويق الان وانا استفدت منه جدا عملت صفحة خاصة بشغلى اسمها جولدن فينجرز ومن خلالها بسوق شغلى داغير ان عن طريقه بنتعرف فى الميديا والاعلام والصحافة‏ .

ايه المعوقات اللي بتقابل صناع المشغولات اليدوية في مصر .؟
: ‏المعوقات اللى بتقابلنا اولا...... تقدير الناس لشغل الهاندميد وانهم يعرفو انه نتاج ابتكار ومجهود فنان مش مجرد سلعة عادية يعنى نفسي الناس تقدر شغل الهاندميد ويشجعوه بدل مانستورد شغل من الخارج ثانيا التسويق و ده مهم جدا ..
فيه فنانين موهوبين جدا لكن للاسف مش عارفين يسوقوا شغلهم عشان كدا لازم يتعمل معارض فى كل المحافظات بأجور رمزية لتشجيع الفناين ..بالاضافة الى محاولة تصدير المنتجات الراقيه للخارج عن طريق السفارات وعمل معارض‏ .

كلمينا عن نشاطك المجتمعي ؟
: ‏بقوم ببعض الانشطة على حسب الوقت المتاح لى مثل تعليم الفتيات الصغيرات شغل الاكسسوارات وبنعملهم معرض صغير يبيعوا فيه المنتجات .

من وجهة نظرك ايه المشاكل اللي بتعاني منها المرأة المصرية و خاصة العامله ..؟
: ‏الضغوط من كل الجوانب دون تقدير المرأة المصرية ام وزوجة وانسانة منتجة مطلوب منها تحافظ على بيتها واولادها وزوجها وتخدمهم غير مجهود المذاكرة الرهيب اللى بتقوم بيه بجانب عملها ومحاولتها لاثبات نفسها فهى طول الوقت مضغوطة من جميع الاتجاهات وبتبقى محتاجة للتقدير المستمر ومحتاجة ان يكون لها شئ خاص بيها تحبه وتمارسه وتشبع هواياتها ومع ضيق الوقت وكمية الضغوط دايما بتيجى على نفسها

ايه أبسط احلامك للمرأة ؟
: نفسي كل سيدة يكون لها هوايتها المحببة وانها تمارسها ونشجعها لان دى اكتر حاجة بتلقى فيها نفسها وتسعدها .

ايه السلوكيات اللي بترفضيها في المجتمع .؟

: من اكتر السلوكيات اللى برفضها وبقت منتشرة جدا ...هى التدخل المستمر فى حياة الاخرين والهجوم الدائم واللوم الدائم والحكم على الناس ونشر خصوصياتهم و الاشاعات والكلام الكتير والمهاترات وتضييع الوقت وكل دا طبعا بنشوفه على النت ومواقع التواصل الاجتماعى بشكل مستفز
دى اكتر حاجة بكرهها وعمرى ما بشارك فيها ....انا بحب اكون ايجابية اشتغل واعمل حاحة مفيدة واشارك بالاشياء النافعة وبحب السلام والهدوء ...

كلمينا عن تجربتك مع ممارسة الطب و الصيدلة ...
‏بعد التخرج عملت سنة فى صيدلية فى مركز صحة تابع لوزارة الصحة وبعدها استقلت واكملت مشوارى مع زوجى فى تأسيس صيدليتنا الخاصة من اول علبة دوا وانا معاه وبساعده وحتى الان‏ .

ايه الفرق في المعيشه في الشرقية و الحياة في القاهره من حيث المميزات و العيوب ؟

انا اتربيت في الزقازيق والمعيشة فى الشرقية ميزتها انها بسيطة وغير معقدة والانسان بطبيعته لكن عيبها انها مبتديش الفنان الفرص الكافية لانها بعيدة عن كل شئ من اماكن الخامات والميديا والتسويق والتقدير احلى حاجة هناك هم اهلى واصحابى . وحاليا انتقلت الي النزهه الجديده بالقاهرة وعلى العكس تماما .. الميزة هى توفر فرص العمل والتسويق والشهرة والقرب من اماكن بيع الخامات وكل شئ متاح واما عن عيوبها فاهمها الزحام و الدخان و الصخب و التكلف في كل شيء ...