ماقدرش اشوفك تاني
ولا تاني ..
أقدر أحبك واترسم
جوّه طريقك شوق وعشق
طفل الهوى اتوئد
لمّا رقد شوقك خلف الحيطان
أنا كنت عاشقك رغم السكوت
أنا كنت حابّك حب موت
نورس في شطّك وحاطط
...
عشقك غريب الملامح
ولا حتى طارح طعم المرار
بيوت بيوت
لكن سكوت
وكنا و كان ..
للحلم صوت
...
على قلبي عشقك
تقلت حموله
وأمدّ إيدي
ماقدرش اطوله
...
مرايتنا نسيت وشنا
ولا عرفنا مين غشنا
إنتي ولاّ انا
ولاّ حدّ مش مننا
مكسور يا مقداف
وانا قلبي ما خاف
غير لمّا شافك متغيّره
...
إكسريني على دربي من تاني
غريب وتايه في المواني
وابدريني حلم تايهة ملامحه
وساعات بدون دقايق أو ثواني
ضلّ الهدى .. ضلني
وحتى بابي صدّني
خليني على ورقك
سطر متدّاري في الهوامش
...
أتارى المدى مش ليّا
ولا عيونك كانت لونك
حاوبت اجرّب الأسيّة
ما قدرتش في مرّة أخونك
...
في الشرفة طيّرت عصفور وطار
وقفلت القفص على دمعي
ولا مرّة أشواقي نسيتك
ولا مرّة خانت
يمكن غيومك بدّلتني
غيّرتني ..
فرّقتني في المسافة ألف خطوة
بيني وبينك مسافة
بيني وبينك ألف خطوة

***