أحلمي وخلي حلمك دايماً قصاد عينيكى ، أحلمى واوعي أبداً تستكترى حلمك عليكى ، أحلمى وتأكدى أنه حايجي يوم ويتحقق حلمك مهما كان كبير ، مهما كان مستحيل برضه أحلمى لان بإصرارك على الحلم حايتحقق.
ناس كتير زيك حققوا حلمهم ومادوش فرصه لليأس يأثر عليهم وإذا كنتى عايزة تحققي أحلامك ماترجعيش لورا إظهرى كل مواهبك وكونى الأفضل واصبري وأوعى تسمحى لأى حد يعترض طريقك ولاتترددى
كونى قوية ..كونى شجاعة وافتحى قلبك للى بيثقوا بيكى ..صممى على النجاح .
وتأكدى إن أى حاجة خطرت ببالك هى قابلة للتحقيق مادام عقلك قدر يتصورها ويتخيلها تبقي ممكنة
لأن المستحيل الوحيد اللى موجود في حياتك هو الحاجة اللى لسة ماخطرتش على باللك . مهما كانت ظروفك مهما كانت حالتك دلوقتي أكيد في طريقة .. أكيد في مخرج .. أكيد في حل .. وهو ده اللى أنا مؤمنة بيه طالما الواحد شايف نفسه في مكانة معينة أو وضع معين يبقيى هو قادر علي تحقيق التصور ده .
اكتبي الوصفة دى كويس ودايماً خليها قدام عينيكى بكل مقاديرها وهى :-
مقدار كبير من قوة الإرادة 
مع مقدار من التغلب عل الخوف
مع مقدار من الإيجابية والابتعاد عن السلبية 
مع مقدارين من تحديد الهدف
مع مقدار من الواقعية 
مع مقدار كبير من الاهتمام بالنفس وتحسين الذات
مع مقدارين من الصبر
وتخلطيهم مع بعض وتحطيهم قدام عنيكي علي درجة إصرار عالية جدا .. 
وبكدة تكون الوصفة خلصت وجاهزه تماماً للتنفيذ !! 
جربيها وقوليلى إيه النتيجة اللى طلعت معاكى ؟!!
واوعي تبطلي تحلمى . كونى جميلة واحلمى