حلمك يدوب بايت 
من يومين لسه انولد
مكنتش لسه السنين فاتت
ولا قلبك الصافي انجلد
اسمك دلع لونك جميل
رسمك يدوب . عِدّي الفروض
انتي الهدوء ال اتمنع 
نرجع بقي لحلمك ياريت
حلم السلام ال ياستّي دايب
ف قلبك جوا الوريد
ونقول كمان 
حسي بأمان 
الحلم لسّاه أمل ماهوش باهت
لسه الجمال ال ف عنيكي
سايب معالم لسه مخطفهوش شبح خوفك
لسه طيفك متلمسش من شذوذ الحزن فيكي
سايب كل الكائنات تبكي عليكي وانتي قايمه تلملمي نفسك
وتداري كسوفك
نرجع بقي لحلمك ياريت 
لسه غايب ؟! 
ولا شايب 
ولا مستخبي لسه انتي زي مانتي ! 
طب حاولتي تفهمي ؟! 
ولا لسه سايباها لحد ماتندمي !
طب ولونك !! 
لسه شايفينه جميل ؟!
لسه اسمك علي ودانهم أصيل ؟!
لسه دلع ؟!
ولا الزمان غير ملامحك !
انتي اصلا مهما سموكي حزينه
انتي زينه
انتي لو مريتي بينهم هتلاقيهم فغير زمانهم
اما انتي ... زي مانتي 
لسه عودك اصله وردي
لسه زهر الحظ يمكن متلعبش
بس فيكي خفه دم متتوصفش
فيكي روح قادره تخلي كل صوره وهم حق ميتنكرش
وان سألوني ليه انتي كده ! 
هل عندي رد ؟؟ مفتكرش
نرجع بقي لحلمك ياريت
اصل مهما لفينا الكلام 
مهما بعنا واشترينا مهما طولنا الملام
اكتفينا ✋
وله حد قايل علينا اقتلوها بانتظام !
لو كنت عشت بانتظام . اقتلوني بانتظام
لو كنت عشت بانتظام .. اقتلوني بانتظام
وله هي الحرب خدعه جايين كده ف لحظه سلام تقتلوني !!
نرجع بقي لحلمك ياريت
حلمك هيتحقق قريب
بعد ميه او متين
يمكن تكون ارقام خطاوي فرحتك او سنين
عادي مش فارقه مدام قلبك حزين
لسّاكي فاكره تسألي انتي فين !! 
لسّاكي ساذجه يابنتي انتي !! 
انتي فعلا ... زي مانتي !