ياسيادة الريس
انا مش معترضه على رفع الدعم
انا معترضه ان ده الحل الوحيد عندك
ارفع الدعم لكن قبل ماترفعه اعملى رقابه عالاسواق واحمينى من جشع التجار ماتسيبنيش منى ليهم
ارفع الدعم لكن اعملى تامين صحى علشان ما اخافش من المرض 
ارفع الدعم بس وفرلى حق فالمواصلات اللى بقت مربوطه بسعر الدولار
ارفع الدعم لكن علم ولادى فى مدارس محترمه
ياسيادة الريس
انا مش معترضه على رفع الدعم انا بس عاوزه اقول لسيادتك ان فرق الدعم ده كنت بتعالج بيه واعلم ولادى بيه ..باختصار كنت بعيش بيه
يا سيادة الريس عارفه انك هتقولى اشتغلى وانتجى....
بشتغل ياريس ماهو لازم اشتغل علشان انا الطبقه الحائره اللى مالهاش حق فى بطاقة تموين ولاهى من الطبقه العليوى اللى مايهماش دعم ولا اسعار
بشتغل ياريس علشان انا من الطبقه اللى بتصرف على نفسها ولو مابتشتغلش تموت ويموت ولادها جنبها 
لكن اللى قضى عمره كله بيشتغل وكان من كبار الموظفين والمعلمين وغيرهم ومعاشاتهم اقل من معاش التكافل والكرامه وكان حيلته اللى مصبراه فرق الدعم ياريس 
والارمله اللى بتربى اطفال ومعاشها بعيد كل البعد عن الكرامه كان فرق الدعم بيحفظ كرامتها... وغيرهم وغيرهم 
ارفع الدعم وماتزعلش منى ياسيادة الريس اهو كلمتين بفضفض بيهم من همى