قد يعجبك أيضاً
قصيدة ( وبرغم الصوت الخواف )
يمكن وشك يعشق
إن تخوني ملامحي
تنزل دمعة قلبي
وأثور عالقدر المبتور
لكن أبداً أنا مش حاوصلبك
لطريق المجهول اللي اتعودت امشيه
لبيبان المدن المسدودة من غير عنوان
لكهوف الشمس المفقودة من أزمان
يمكن وشك يعشق
إن حصاني يكون جامح
في دروب الصبار الملفوفة
بغابات من شجر المر المبدور
في مداين لسه بتكره لون النور
لو غطى ف مرة ملامح إنسان
لكن بابدأ في طريقي من نن عينيكي
أرسم نيلي وقناديلي ومواويلي ف حواريكي
يكسرني صوت رفضك لكني باحاول
واتشجر في طريقك رغم الأرض البور
يمكن وشك يعشق
إنه يشوفني ف أي مكان
مصلوب على بابك في الليل
مستني ميعاد السياف
لكن أنا باصرخ " أنا عاشقك "
وبرغم الصوت الخواف
مقالات مشابهه
آخر التحديثات
من قسم آخر
عاجل
راديو القمة
