نهاااية الكلام يابلدي انا مش خواف
ولا غاوى مرمطه وقسام ولا على الفاضى شغال هتاف انا بس طالب عدل وسلام
يامصر ياللى كنت بحلف بيكى اكتر مابحلف بحياتى
يامصر ياللى كنا مدافيين بعض انا وانتى وباقى اخواتى
دلوقتى ياختى بقيتى تسيعى الف من الحبايب
طب مدام وسعتى ماتشيعى لإبنك اللى غايب
بقيت استغرب عليكى..مزلول رغم انى قاعد فيكى!!
خلاص شاخ جريدك واتنا حديدك
ومبقتيش تنفعى.لأ اوعى
دا انتى المجد والتاريخ يشهد عليكى
يشهد عليكى وعلى العظمه اللى فيكى
بس واعره منك لما تضحكيلهم
وتيجى عندى تديرى ضهرك وتتلوى
يعدوا توقفى وتعظملهم
وعندى زى مايكون بتقولى ناقص ادب ولازم يستوى
ولما اقولك اتعدلى..تقوليلى انت بتعمل لعيالك
ايوه بعمل لعيالى
عايزهم يطلعوا يلقوكى لسه زى مانتى..لسه زى مانتى حطانك ماتهزتش وقويه
لسه زى مانتى ماعجزتيش وعافيه
يابلدى ياللى قلتى عليا!!يابلدى ياللى قلتى عليا
بتاع الكيف والحشيش والافيون
ياشيخه دا انا بالعافيه..بخلص كوباية الليمون
وبعدين هتكيف؟ازاى واخويا عندك مسجون
انا نفسى افهم ليه قسمتينا نصين
نص عايش فى القصور...والنص التانى فى الطين
اه ياقلبي ياعليل ياحزين
سينى؟سينى لسه صغير
بس شبت انا وصغير
معقول مش لاقي ليا فيكى مكان
والغريب سكنك بشوية طبطبه وحنان
وخلاص معدش ليه عازه اللى كان:مرعيكى وشايل
مش من دلوقتى لأ من زمان
بس هعمل ايه مقدرش ءاذيكى
والله بجى قصاد ءاذيتك وببقى جبان
.`.طب قوليلى ايه اللى يريحك
اغنيه وغنتلك.والشعر وكتابته
عمرى فداكى.وعلشان حماكى
بالدقيقه حسبته
فكفايه..كفايه كل مااروح مكان
يقولولى وطنك ليه سبته
دمعى؟دا انا دمعى مبقاش يجف
انا وصاحى وانا ونايم
انا وقاعد وانا وقايم
بقيت دايما معلول
سرحان وهايم
واحب اقولك انا مش سياسى
ولا ولد عاق وعاصى
ولا افضالك عليا ناسى
انا الفلاح..انا الفلاح اللى ايديا اتشققت من كتر ماطوريتى دابت فيكى
انا العامل اللى صنعك
وحدد ملامحك..وبين عنيكى
أنا وانا وانا كتير
اهم حاجه فى الاخر التقدير
لانها مسخت على الاخر
كلت انا المش
كلوا هما منجه الفاخر
يعنى تعبى يروح هدر
علشان يسكنوكى شوية فرافير
وبعدين انا مطلبش الدنيا تتقلب يعنى
انا كل اللى طالبه شوية تغيير
انا كل اللى طالبه شوية تغيير