ودخل عيدك يا ست الحبايب 
وجيبي فاضي كالعادة خايب 
دخل عيدك يا ست الحبايب 
والبلد كلها بتحتفل 
كل واحد في حاله يصطفل 
أصل انا احتفالي غير اي احتفال
فسيبك بئا من لعب العيال 
وتعالي هسمعك الئصيدة 
بالوزن والقافية الجديدة 
حكيت ياما من يوم الولادة 
صرختك وسط العيادة 
خايفة عليا كالعادة 
وبعد الصرخة جات البسمة علي وشك منورة 
ده شبه ابوه كأنه نسخة متصورة 
رغم التعب . رغم الألم . رغم الوجع
مابتفكريش الا فيا 
ضنيا عامل ايه. 
هات اشيله شوية 
رغم الآهات بردو خايفة عليا 
تقولي يا واد يا عبيط انت اللي ليا 
انت سندي ونور عنيا 
والروح اللي كلها فيا 
ولما تكبر 
لما تكبر هتبقي انت عكازي
انت اهلي وانت ناسي
بس اوعي تكون زيهم عليا آسي
قولتي ياما كلام كتييير 
براحة عليه وانتو رافعينه
بيشكيلي بس انتو مش سامعينه
براحة عليه وانتو رافعينه
كلامك ياما كان علي قلبي نسمة 
شوفت قرصة سنتك علي شفتك تتحول لبسمة 
كلامك ياما كان علي قلبي نسمة 
شوفت قرصة سنتك علي شفتك تتحول لبسمة 
شوفت قسوتك علي نفسك عشان ترضيني
أول ما أقول واااء تصحي وتلاعبيني
شوفت سهرك كل يوم جنبي
عمرك شاخ ياما وده كله ذنبي
حسيت بيكي وانتي داخلة تغطيني
ونمتي جنبي عشان تدفيني
شوفتك وانتي ماشية براحة خايفة لتقلقي نومي
وانا ف نفس اليوم .ياما اصحي جبيلي اشرب أومي
وانتي برده بتتسحبي خايفة لتقلقي نومي
أد ايه كنت عليكي آسي 
قولتيلي وصية بعدها طلعت من راسي 
لكل حاجه كنت ناسي
اتحولت لشاب عاصي
كنتي بتشوفي ابنك بيكبر أدامك 
كان حلمك لما تكبري يكون خدامك 
آدي ابنك كبر 
وشنبه خطط
وخلاص بقي عليكي يطنطط
وصوته اخشن شوية 
ومش مبطل أسية 
كنت بستهزء بخوفك عليا 
يا حبيبي ماتطلعش ع الشارع عشان العربيات
ولو حد ضايقك امشي من سكات 
امشي يابني جنب الحيط 
خوفي عليك مش شئ عبيط 
ولا حتي كلام بسيط 
وانا بردو بستهزأ بالكلام 
أقول حاضر والسلام 
وبوسة واحدة أراضيها 
تقولي يا بكاش وتعديها 
بس رغم اني كنت شاب طايش 
اهي حياة واديني عايش 
بس كانت امي جوايا روح
روح مليانة بالجروح 
بس مخبياها جواها 
سبحان من سواها 
وخلق الخوف علي ضناها 
سبحان من طبع الحنان فيكي 
سبحان من جعل الحياة بيكي 
بس خلاص ياما 
خلاص ياما ابنك رجعلك 
ولو ينفع يسجدلك ويركعلك 
ويشكيلك ويسمعلك 
خلاص ابنك هيعيش في طوعك 
هيحوش اللقمة منه وقت جوعك 
هيفتكر دعاكي وكمان خضوعك 
هيتصنت عليكي وقت خشوعك 
بس سامحيني ياما 
سامحيني علي لساني الفالت 
علي هموم الدنيا اللي عليكي مالت 
انا ابنك الوحيد اللي لا 
له أخ تاني ولا تالت 
سامحيني علي هموم الدنيا اللي عليكي مالت 
خديني ياما ف حضنك الدافي
علي صدرك أبو قلب صافي
خديني ياما وضميني 
لحياتك انتي رجعيني
وغلاوتي عندك ما تسيبيني
ماتحرمنيش ياما من صوتك 
والله بفهم كلام سكوتك 
نفسي ربنا مايأذنش بموتك 
لو الكل مات ... يفوتك 
نفسي ماتحرمش ياما من نبرة صوتك 
نفسي تخلدي ياما ماتمشيش
من غيرك الحياة والله ماتسويش
بدعي ربنا انك ماتسبنيش
....
بس لو شاء القدر 
وحكم ربك صدر 
وملك الموت خبط علي بابك 
وخلاص هينعيكي لاحبابك 
هلعن الموت اللي صابك 
وهجري هناك ع المقبرة
هحفر عليها اسمي واسمك 
هوصي الدود مايكلش جسمك 
هوصي كمان ياما التراب ف الارض
هزرعلك هناك الورد 
ولو ينفع والله هصليلك الفرض
وهدعيلك يثبتك عند السؤال 
ماتنسيش اللي حفظتهوني 
لما كنت صغير بلعب مع العيال 
هدعيلك يثبتك عند السؤال 
الجنة ليكي شئ اكيد مش شئ محال 
ولو عليكي ذنب ياما 
أنا أشيل ذنبك 
بس خديني ف المقبرة جنبك 
ولو عليكي ذنب أنا أشيل ذنبك 
خديني ف المقبرة جنبك