يا اللى غاوى تزيد حكاوى

قولى عن ايه تانى غاوى

يا اللى غاوى تروح قهاوى

ايه فيها يغويك حاكينى

اى ورق كوتشينة فيهم

تحب تشبه بالتمام

أوعى تكون زى الولد

بتقش بيه وتنفرد ..

أوعى فيوم تكون زى الكومى

بتلم بيه ياما ورق وترجع تقول

مين اللى غش وخدعى بيه

يا اللى غاوى تروح جناين

قولى بقلبك زرعت ايه !!

زرعت ورد ولا ايه !!

ايه اللى غاويك وبيخليك

تروح بنفس اللهفة

وكأن روحك فرع شجرة

أو حتى غصن أبيض يافل

تطلب العين تشوف الخضرة

وتبعد عن الصبار مش بشوقها

لكن ياما سمعت عنه قصص

تخلى الروح متنجذبش

لأشواك غصونها ..

قفلتها ببساطة ومغوتش

مرارة ومحتاج لصبر..

وصبرها مطلتهوش

غير مع حبيب رسم ..

على الشجرة أسمه وأسمها

ده ياما شافت رغم صغر سنها ..

دبسها القدر فاللى خان

عهدها وبكاها بدل الدموع

أنهار تسقي وردها اللى

كانت بتزوروا يوماتى

وأحب حاجة لقلبها بتفرحها

من غير ما تحكى ولا تهاتى

أكيد مش هنحكى عن غلباها

ده ياما القلم كتب عن مأسى

واللى غاوى قصور قديمة

وعمله وطوابع قديمة

يحب يجرى ويشتريها بلهفة

وسعادة محدش يلومك

ولا يقولك أنت كده صريف

وبلاش تشترى وتجمع

أصل هما يومين ياسيدى

وكله هيأش وميفتكرش

يكتبك فسطر من السطور

ويقول ده هو السبب فكل دول

كل واحد غاوى فدنيته

شيىء يخفف عنه دوشته

فمتنبهرش باللى مبيهربش

من دوشته لانه ببساطة

مفيش شيىء يسحروا

أو حد معرفش ياخدوا

من أيديه ويقوله روح

أعمل اللى نفسك فيه

أطلع بره فكرك باللى تهواه

أصل سعادتك دى شيىء

أساسي مش حاجة من

الممنوعات والدنيا جبراك

على التعاسة ..

بس مين يفك من الغلاسة

ويسيب القيود اللى عمت

وخلت في أرواح حبيسة

تخاف تقول عن نفسها

لتكسر خاطرها وتبقي

فروح معتمة ملهاش نور

ولا شيىء يبهرها زى

ما كانت طفلة وعندها

أحلام بترسمها ..

كان ممكن تطلع رسامة

أو بطلة من الأبطال

فالسباحة ..

أو اى شيى نفسك بتاخدك

ليها تشق للنور ..

وتبقي روحك سعيدة بيها

سيب روحك من التكشير

بلاش توهمها بأوهام

تغيم على الضي الباقي فيها .