في هذا الوقت من كل عام نحتفل بعيد الربيع والذي يعرف بشم النسيم ، فيتحول فيه المصريين إلى أكلي لحوم الفسيخ والذي تحول إلى مرض أصاب هذا الشعب بلوسه عقليه ، تخيل إنك اخدت سمكة جميلة خلقت لكى يتم شويها او طبخها بطريقة السنجاري أو قليها ، وتقوم بدفنها ووضع الملح عليها وتتركها حتي تصل إلى مرحله ( قرح الفراش والنتانه ) ، نفس اللون .. نفس الريحة .. نفس الشكل .. نفس البيكتريا التى تلوث الجروح ، وفرحان ان اللحم ده بيدوب في بقك .. ما هو متحلل يا حبيبي .. اي جثة متحللة حتدوب في بقك عادي .. كونك بتحبه اللحم المتحلل .. فانت مصاب بخلل في مراكز الادراك والحس .. وحاجة مينفعش تبقي فخور بيها .. تأكله في اوضة ضلمة وانت بتعيط علي حالك وبتدعي ان ربنا يهديك .. مش تقعد كمان تتريق علي الناس الطبيعيه اللي بتأكل السمك مطهي ومتبل كويس وتقول عليهم مش طبيعين ... متفرحوش انكم كتير وصلنا أننا بنصرف مئات الملايين في يوم لشراء وجبه نتنه مسممه وبنأكلها ونقول ربنا هيسترها من هذه الوجبه ، اللي المصل الشافي من خطورته قبل تدميره لأجهزتك الحيويه واللى ممكن ينهي حياتك في عدة ساعات إذا لم يتم إسعافك بهذا المصل اللي يصل تكلفته 90 الف جنيه مصري !!!!!!!! أصبحنا شعب يتاجر في الموت فيحول وجبه صحيه عاليه القيمه الغذائيه من سمك البوري الطبيعي الذي يتكلف الكيلو حوالى ٦٠ جنيه مصري ، إلى وجبه مسممه يصل الكيلو فيها الي ٢٠٠ جنيه علامات تعجب وإستفهام ، بزمتكم مش ده شعب عاوز يتحاكم على الإستهانه بصحته ، أنا أطالب بتشريع يجرم عمل الفسيخ وبيعه وأكله إعمالا بقوله تعالى : ( ولا تلقوا بأيديكم إلى التهلكة ) صدق الله العظيم . (الشعوب التي تريد بناء أوطانها لابد من بناء عقول أبنائها وقتل الجهاله من نفوس عوامها) .