لحد أمتي هنفضل نحلم ومش عرفين نوصل للي بنحلم بيه ، ومع إن الحلم بسيط وكل متطلباته موجوده ، دوله شابه وفتيه وخيرات وموارد بشرية ومادية ، مثقفين ومبدعين بس للاسف محجمين ، حضاره وتاريخ دين ومتدينين بس للاسف متلخبطين ثوره وعملنا تفويض وفوضنا تصحيح وصححنا بس مفيش حد بيسمعنا ، لحد أمتي يا وطن مش عارفين نتعلم ، عشان مش عارفين نبني منظومه للتعليم ولا نصلح المنظومه الموجوده عشان تساهم في رفع مستوي الفرد وتساهم في تحسين المستوى الثقافي والحفاظ على ماتبقي من منظومة القيم

الدوله من المعروف إنها لها إستراتيجية وخطط بتمشي في مسارات متوازية ونفسنا نشوف بجانب المشروعات القوميه مشروع محرك تعليمي ومشروع محرك ثقافي ومشروع محرك رياضي ونشوف خريطه تعليميه حكوميه واضحه ومعلنه ورعايه للشباب ممنهجه

إحنا وصلنا الى مرحله أن العلم ومخرجاته لاينتفع به ، أصبحنا نمتلك الكثيرين الذين يمتلكون درجات علميه في أبحاث ليس لها قيمه وأنصاف متعلمين بشهادات لاتعبر عن الواقع وتجاره بالعلم والمتعلمين وإبتعاد عن ثقافه البحث العلمي التي هي مفتاح من مفاتيح التقدم

لذلك أصبحنا دوله بلا إسهامات في العلم بل أصبحنا دولة مستقبلين ومستهلكين للمنتجات من دول أوروبا ودول شرق آسيا بعد ما كنا مصدرين للعلم والعلماء معدش ينفع إننا نضحك على نفسنا أحنا لازم نواجه بشفافيه ووضوح فأولي خطوات التقدم هي تحديد المشكله والإعتراف بها ، حقيقه إحنا معندناش صناعه إلا ما ندر إحنا مصانعنا مصانع تجميع منتجات وليس تصنيع ، وكل يوم بيعدى علينا بدون مانبدا بدايه حقيقيه بنتعب زياده وبنبعد بعيد ، مع إننا كلنا موافقين نتحد ونواجه ونتعب ونصلح بس نكون كلنا ،
مش بعضنا يتحمل الإصلاح والباقي بيتفرج عليه هو مش الإصلاح الاقتصادي ده متخطط ومدروس كل خطواته ، طيب إعلنوا لنا هذه الخطوات ولحد أمتي هنفضل صابرين ومطحونين عشان نقدر نكمل

وعوزين نعرف الإصلاح الاقتصادي هو بس زياده في الأسعار ورفع للدعم اللي مش عارفين مستحقينه وزيادة معاناه وسوء في الخدمات وبهدله للمواطنين ، علي فكره مش هو ده الإصلاح ده أسمه التخريب اللي بيتمناه لنا أعداء الوطن وبيشتغلوا عليه وبيرسخوه في وجدان الفقراء والجهلاء لانهم بيعتبروا الأرض الخصبه لنشر سمومهم ، في غياب من الدوله اللي عامله مش شايفه ومش سامعه ، وبتنفض إيديها من التعليم والصحة ومن الكهرباء والبنزين والدعم ، واحنا مش فاهمين ومش مستحملين ومش متعلمين عشان نقدر نحافظ على اي إنجازات

مش لازم نصطاد السمك من وسط البحر وإحنا ممكن نصطاد السمك من جانب الشط ، الصيد ممكن نعمله من المكان الأمن بدل مايغرق بينا المركب في وسط البحر وإحنا مش بنعرف نعوم ، مش لازم يكون هدفنا المستثمرين الأجانب وإحنا ممكن نستثمر بالمصريين والدليل لما حبينا نوسع القناه في ست أيام كانت المليارات موجوده ، إحنا بينقصنا رؤيه واضحه للإستثمار وتكون شراكه مع المواطنين المصريين بكده هنحقق الكثير من الإصرار علي النجاح للحفاظ علي مقدرات الشعب وتوفير فرص العمل التي ستساهم في توفير حياه كريمه للمواطن المطحون واللي بيحب بلده وبيضحي بحياته عشان يحافظ عليها ،
مش لازم كل يوم تفوق على كارثه ونعتمد على نعمة سرعه النسيان حوادث القطارات أروح بتروح بسبب الإهمال والفساد في وقت بنشتغل فيه على شبكة الطرق من اجل التنميه !

الإصلاح الاقتصادي الحقيقي هو بناء الإنسان بمشاركه حقيقيه وشفافيه ومصارحه وتعاون من أجل تحقيق التنميه والعمل علي توفير الحياه الكريمه للمواطن الغلبان ، ونطمح لتحويل الكلام من كلام مصاطب لكلام في المليان.