أنا هبه من الاسكندرية عندي 30 سنة للاسف أتولدت بمرض نادر وقتها اسمه الاسكلوسيس او انحناء بالعمود الفقري طبعا اهلي داخو بي علي الدكاترة ومكنش في حل غير العملية وللاسف الانحناء زاد وكل ما نموي يكبر العمود الفقري بينحني اكتر لغاية ما عملت العملية وأنا عندي 12 سنة وللاسف كان لي مرحلة تانية بس متعملتش لاني دخلت العمليات مرتين بعدها اثار جانبية للعملية 
وللاسف الانحناء زاد اكتر واكثر لان سني بيكبر وكل ما بكبر كل ما الانحناء بيزيد والعمود الفقري بقي بيقرب من القلب وكل الدكاترة الكبار رفضوا يعملوا العملية وانا دلوقتي بقيت كل يوم في المستشفي لان العمود الفقري ضعط علي رئة بحالها وبقيت اتنفس برئة واحدة وللاسف العمود الفقري بدء ياثر علي الثانية دي حالتي بأختصار 
انا ببعت هناا وانا عارفة ان مافيش حل علي الاقل في مصر وصعب جدا اني اتعالج برة مصر نظرا للتكلفة العالية 
انا بصراحة بكتب لسببين الاول ان من حق نفسي علي اني اعيشها كويس علي الاقل متتألمش أعيشها حياة أدمية وعشان لما أقابل ربنا ويسالني عملتي ايه لنفسك أقوله اني عملت كل شئ واستنفذت كل الطرق 
ثانيا نفسي يكون في مصر طب متقدم يعالج اي حد بيتالم اكيد المسؤلين مش عارفين احنا بنتألم أزااي من حق كل انسان لم يتعب يلاقي المكان اللي يتعالج فيه 
حاجة أخيره لكل اللي هيقره ده ادعولي هو ده اللي محتاجة فعلا أدعولي بالقوة علي تحمل الامل ادعولي ان ربنا ما يحوجني لحد أبدا غيره