كبرت يا امى وعرفت ان المكان الحلو بذكرياته الحلوه مش بجمال المناظر اللي فيه. 

كبرت يا امى وعرفت ان الاغاني الحلوه هيا اللي بتمس حاجه عشناها مش معناها كلمه ولا لحن حلو.

كبرت يا امى وعرفت ان الناس كلها وشين وش بنشوفه ووش تاني في قلوبها وكتير اوى بيكونوا عكس بعض .

كبرت يا امى وعرفت ان المصالح عند الناس بقت اهم من اللي اسمه ملح وعيش فيه حاجه جديده يا امى بقوا علاقه تيك اواى .

كبرت يا امى وعرفت ان الحب مبقاش سكن وموده بقي ليه اسم تاني سموه صفقه حد فيها كسبان والتاني مقهور وخسران .

كبرت يا امى وعرفت ان الكتاب اللي أنتى علمتيني منه ابقي حد جدع وطيب ومحترم وابن ناس طيبين انه اتلغي من المناهج وحطوا مكانه صور واشكال ورسومات مش فاهمه منها حاجه .

كبرت يا امى .كبرت بس نسيت اقولك قطعي شهاده ميلادي اللي عندك غيروها صدقيني ..بقي عمرنا حاجه تانيه خالص ..بقوا سلالم وجع ..وكتير مواقف فراق وخداع واكتشافات ..وحبه وقت حلوين لافيناهم مره صدفه مع شويه ناس غاليين ... احسبي بقي عمرى يا امى وقوليهلهم ..مش بقولك كبرت يا امى ..ولغينا الكتب ونسينا الحسابات...