اسمعيني قبل ما يفوت الأوان 
ده الديب جعان 
محتاج ينول 
والليل بيكسي الغيطان 
صرخة عيال 
جوة البيوت والخوف يفوت 
بيدق كل البيبان 
شمعه تقيد ونهار شهيد 
مشنوق وميت ع العيدان 
مبقاش خلاص حبة حبوب 
والجوع بيصرخ 
فى بطون كل العيال 
صوت الآذان 
واقف كسيح 
والفجر ضايع من زمااااااااان 
صرخة جعان 
ساكن في صوت 
واحد ضعيف محتاج رغيف 
او حتي حبة م الفتات 
ويقوي بيه جسده النحيف 
ده الليل مخيف 
اشباح وساكنه في المكان 
بدق باب كل البيوت 
رعشة وصراخ 
والخوف عنيد 
قاعد مربع ع البيبان 
والليل يطول والفجر خان 
لحظة نهار والحلم موت 
لو يوم تفكر فى النهار 
او يوم تكون واحد ملاك 
خليك شيطان 
او ديب بيحلم 
انه يخطف العيال 
والليل سنين فيها العجاف 
واه يا صوت 
مخنوق هنا لحظة سجود 
بدون اذان 
حتي الشعائر زار وطار 
والرقص فن 
مايعرفوش غير الكبار 
العارفين 
المؤمنين 
الخاشعين 
لدين غريب واله جديد 
اسمة الشيطان