والشتا اللي خبا وجعنا عمنول
خلص الشتا ووجعنا دا مطول
مر الخريف بلبسه الخفيف
والحزن من تقله علينا متحول

رايحين نزور ديرك 
ملناش حبيب غيرك 
واخدين معانا العيال
طلبين تدخل بتدبيرك

تلحقنا من ضيق الحال
م الغلا والزمن لو مال 
الحزن راسخ ف جوفنا 
واثقين ما عندك محال

من ضيق ل ضيق طوفنا 
مساكين وتعرفنا 
ملناش الا في تمجيدك 
وسكوتك بيخوفنا

صوت المدينه ضجر
وقلوب بتشبه حجر 
الظلم بقي حاكم 
وطوبي للي صبر

ورجعنا من ديرك 
رايحين ل نار غيرك 
حبه بشر مش بشر
قتلونا والحكمه ف تدبيرك

ملناش في حكمك فهم 
الموت في اول سهم 
يطردنا يلحقنا 
كان اولي تلحقنا من عندك يارب

صلينا صلاه باكر
وغير وجعي مش فاكر 
هايم في حب قدستك 
بتزمر وبتشاكر

مش راضي وبقول راضي
متراضي مش راضي 
بيضحك ع نفسه 
في موت بقي عادي

فين ردعك وعدلك 
وخوفك ع شعبك

هو سؤال من عشم 
وانا واثق في موعيدك 
سبنالك النقمه تجازي 
فين احنا ف نقشت ايدك