تساءل الإعلامي أسامة كمال، قائلا (فيه كام واحد بيخالف خط السير؟ ومش بأتكلم عن خطوط النقل لما بأقول بيخالف خط السير انما بأتكلم عن أى موظف بيخالف قواعد شغله).
وأضاف كمال في برنامجه مساء DMC، اليوم الخميس، (:سواق القطر ظهر، لأنه سايق قطر يعنى ناس كتير ومحاضر شرطة ونيابة سواق القطر مشكلته إنها كانت باينة محدش هيقدر يخبيها، إنما ناس كتير فى كل مكان بتعمل نفس الأخطاء بتعطل مصالح الناس وتخالف خط السير، ورغم أن الجريمة دى بتتكرر كتير لكن مالهاش عقاب وعشان مالهاش عقاب فبتتكرر).
وأشار إلي ان (الايجابي في الموضوع إن الركاب اتحركوا وما مصمصوش شفايفهم وشتموا في السواق والسكة الحديد والبلد وراحوا ركبوا حاجة تانية، الايجابي هو المحضر، والايجابي هو تحرك النيابة والايجابي هو تحرك الشئون القانونية في السكة الحديد والايجابي ان الموضوع وصل للإعلام وبيتكلم عنه).
وهاجم كمال (عدم وقوف سواق القطر بعد مروره على المحطة بقنا ، فنيابة نجع حمادي فتحت تحقيق مع السواق الذي ترك الركاب فى محطة دشنا وما وقفش رغم أنها محطة وقوف وكمل طريقه فعمل ربكة والركاب غضبوا وعملوا محضر فى شرطة النقل والمواصلات أن القطر "2007 VIP" ما وقفش فى دشنا، مضيفا أن يعني الموضوع مش هينام لحد ما السواق ياخد عقاب يمنع غيره، انه يفوت دشنا أو كفر الدوار، إن امبراطورية السواقين تفهم إنها مش هتلوي دراع الدولة ولا هتلوي دراع الناس).
ووجه كمال رسالة نارية قائلا ( على فكرة ليهم ولغيرهم، لو الفلوس قليلة، سيبوها وامشوا واشتغلوا في حتة تانية تجيب فلوس أكتر، بيقولوا سواقة التوكتوك بتجيب فلوس حلوة).