بس لو تطول شوية
كنت عارف
ان زميلاتك تملى
بيشفونا جنب بعض فيضحكوا
كنت عارف
ان نفسك تلبسى الجزمة ام كعب
و كنتى ما بترضيش عشانى
من هنا
بدأت اغانينا القديمة
و احنا لسة
جنب سور المدرسة
ولد ف ثانوى
و بنت ف الاعدادى
الشوارع و الحرنكش و الفيشار
و الولاد
لساها بتعاكس بنات من سنهم
و انا و انتى وسط المعمعة
بنحب بعض بشكل مش عادى
وردة جنانك فتحت
ف تشد حبل السنجة
يتعطل ترام ( النزهة )
وردة جنانك فتـَّحت
ف تفرقع بمبة ف (ابوالعباس)
من اول طلقة رش
تتمد ايدين الواقف يزعق فتح عينك
تتمد عينيكى تبوسها
عروسة
- تيجى نسميها
اصرخ ( همسة )
تضحك عينك
- حاسب بالراحة عليها
يوميا لازم ( همسة )
تطالب بالمصروف و النايتى و الكراتيه
تفتكرى ايه خلانا ما نكملش ؟
صغرت علينا اللعبة
و كبرنا ف هدومنا
تؤمنى بالله
فيه لعبة عجيبة بتحصل
مش فاهمنها
امبارح
كان كتفك
اطول من كتفى ( بفطر )
دلوقتى
بقى كتفى اكبر من كتفك شبرين
عفريت
عفريت اهبل ده القاعد تحتيكى
عمال يتنطط من تحتك لكتافى
لتحتك لكتافى
لــ
تـــــ
حــــــــــــ ...
الله يخرب بيتك عفريت
ده باينه نفخلى ف شعرى
اه و اللهِ
نبهنى ( علاء الحلاق ) من اسبوع
- عجزت يا مان
- و طلع لك اربع شعرات بافتة
و اكيد انتى كمان
مش بتفكرى ف الصبغة
ولا الميش دلوقتى
و اكيد ح تقولى لنفسك ليه
و اكيد ح نسلم على بعض
و ح سلم على اصغر اولادك
و حا ملس على شعره
او يمكن ابوسه
على امل ان العفريت المجنون
يقنعك انك تبوسيه..
من نفس الحتة
و اديكى رقم تليفونى
للمرة خمسة و عشرين
تبتسمى
و اسمع صوت البمبة ف ( ابو العباس )
- صدقنى بخاف من مامتك
ف يرجعنا العفريت من تانى
و الاقينى بقولك
بس لو أطوَّل شوية