تفاصيل كتير راح يجي يوم وتجربيها 
وساعتها يمكن تندمي لما تعيشيها 
يمكن يوميها تفكري وتقدري وتسامحي 
قلبي اللي اشترى روحك 
مع انك انتي بتبعيها
بدعي الحياه متجيش عليكي 
وتظلمك وتحسسك 
إن اللي فات كان دين عليكي
وتجربة جرح تشوفيها ااااا 
قلبي اللي شالك جوا منه 
وعاش كأنه يتيم بيحلم بالحنان 
صوت الألم جواه صداه 
دمعة ندم نوتة شجن آلة كمان 
وعزايا اني بفرح لما اشوفك تفرحي 
بشعر براحة قلبي حتى وانتي بتجرحي 
بصي ف عيوني وقولي ليه بتكدبيها 
تفاصيل كتير راح يجي يوم وتجربيها 
وساعتها يمكن تندمي لما تعيشيها

ياملاك وناسي إن بيته في السما 
وف كل غنوة تملي كنتي الملهما 
محتاج لحضن كبير يساع كل الحنين 
محتاج اعوض كل شوق عشته ف سنين 
صعب اني أكمل رحلتي وقلبك بعيد 
صعب اني أكمل سكتي وقلبك وحيد 
يابنت صبري وعمري من غيرك سراب 
عداد سنين مستني يوم يجي السحاب 
شايل مطر شايل قدر وكلمه حلوة. .ماتقوليها 
تفاصيل كتير راح يجي يوم وتجربيها 
وساعتها يمكن تندمي لما تعيشيها

حفل ابتدى وصوتك بدا كروان جريح 
كلمات لشاعر قلبه مات زيك دبيح 
وكورال بينده ع الوجع لف ورجع 
علشان يكون جنبك مصير قبر وضريح 
اجرح كمان وبصوت كمان صحي الجراح 
وف كل غنوة الفرقة بتصحى اللي راح 
لكن عشم من غير ألم مالي القلوب
إن المشاعر راجعه يوم والشوق يدوب 
غنوتي ليكي ابتدت أبقى اسمعيها 
تفاصيل كتير راح يجي يوم وتجربيها 
وساعتها يمكن تندمي لما تعيشيها