مش باودّع
كل أحلامي ف عينيكي
مش بارجّع
كل أيامي ف ماضيكي
لكنّي باندم عاللي راح
شايلة ضلوعي الجراح
بابكي وعينيكي بتضحك
طب ليه بتضحك عينيكي
شبّاكك بعيد
وناصية الشارع ضلام
طارت عصفورة من صدرك
والشال على كتفك اتبعتر
عصفور في ضفايرك واتضفّر
ولا قادر يهرب للخارج
وكتبتك غنواية وغنيّيك
بس المرّ كاسات ف شفايفي
...
في مفارق الريح انهزم الفارس
وحصاني ريح عالأرض بيبكي
أنا عارف إن عينيكي عارفاني
لكن في طريقنا ما بينّا سدود
بيدوّر حلقي على صوتي
بينادي كلامي على سكوتي
وأنادي عليكي والاقيكي
على شالك مخنوق كل يمامي
...
يمكن وشك عاشق
لبيبان المدن المقفولة
يمكن قلبك واهم
إن أميرك راح يحلم بمدينة
شبابيك الشارع مكسورة
وانا راسمك وشم على دراعي
ورسمت خروفك على صدري
وحلفت اني بحبك من صغري
...
قولتيلي ..
"إخلع وشك
غيّر وشك
بدّل كل ملامحك
جايز أعشق لونك "
بدّلت بيباني وحيطاني ومكاني
وزماني وداري وعنواني
قولتيلي .. 
دلوقتي اقدر إني أخونك !!!