عمرو يوسف فنان وسيم مشهور يتزوج من نجمة سورية فيثير حقد بنات مصر, قصة حب قد تبدو رومانسية في الظاهر فهم شخصيات عامة تتجوز وتسوق لقصة حبهم ,فيتعمل عليها بوستات جنبها قلوب كتير وتبقى Trend على تويتر ويطلعوا في كل البرامج وبعدها يعملوا بقى من وراها كام اعلان نكسب من وراه ملايين !

حلو حقكم شئ لطيف ولذيذ بس قصص الحب الماسخة دي متهزنيش ومبشوفش فيها اي شىء رومانسي او عبقري . انا عندى البنت اللي استنت خطيبها سنين عشان يكون نفسه والولد اللي اشتغل وردية زيادة في شغله عشان يقلل فترة الخطوبة ويكمل حاجته ولما اتجوزوا قعدوا في شقة بسيطه في منطقة شعبية عشان ممعهمش يقعدوا في التجمع .

ولما بيحبوا يخرجوا ممكن يتحشروا في المترو وهو واقف وراها يحميها عشان الزحمه وتخبيط اللي نازل واللي طالع . واللي لما يروحوا مطعم ممكن يطلبلها اغلى حاجة ويقولها انا هشرب شاي اصلي مش جعان عشان اللي معاه يادوب يكفي . واللي بتبقى نفسها في فستان جديد بس تقوله انا عندي كتير حرام هنجيب ليه جديد مع انه هو وهي عارفين ان كل اللي حواليهم حفظوا الطقم اللي عندها في كل خروجه او مناسبه .

دي قصص الحب بجد دي قصص الحب اللي تستاهل مليون اعلان دي قصص الحب اللي ورا الكاميرات . الحب اللي بجد بالنسبالي مش الحب اللي اتوفرتله كل الظروف عشان ينجح انما الحب اللي نجح رغم كل الظروف اللي كان ممكن تموته مليون مرة .