السمنة مرض نفسي ويعرف على انه من الامراض اللي بتصيب الجماعات او عدد كبير من افراد مجتمع واحد بسبب عادات غذائية متوارثه متشابهة. زي مثلا المجتمعات والشعوب اللي بتمر في ظروف حرب وبيحصل تهجير بيصيبهم مجموعة امراض نفسية متشابهه. نفس الشيء السمنة وامراضها ومشاكلها بتصيب الشعوب بشكل مشابهه. لان احنا تقاليد مجتمعاتنا العربية مرتبطه ان اكرام الضيف و من علامات الكرم و الحياة الرغدة هي الاكل وعموما البشر في كل مكان في العالم مرتبط الاكل بالمناسبات ده مش حكر على العرب بس كل الدول مناسبتها مرتبطه بانواع اكل . المشكلة فيه بقى حاجة اسمها "تعظيم الاستثناء" يقولك ده جدي مات وهو عنده 90 سنة وكان بيشرب صفيحة سمنه وعشرين بيضه و 10 ارغفه بتاو ومرحرح ده جوز خالتي مات عنده 110 سنة وكان بيشرب 7 علب سجاير كل يوم وكان بيطلع برج القاهرة مرتين في اليوم واصبح الناس عايشين على خزعبلات الاستثناء مش القاعده ان نموذج او اتنين او الف ينفع ينطبق عليهم الكلام ده خصوصا ان الناس دي بتتجاهل باقي قرايبهم اللي عملو كده وماتو بالسرطانات و السكر و الجلطات وكل يومين في المستشفى وفي اخر ايامهم مكنش بيعرف يدخل الحمام لوحده ونظرهم راح واللي فقدو اطرافهم وعشرات الامراض المرتبطه بنظام التغذية السيء للفرد. الخطورة الحقيقية في الاطفال , الطبيعي الاب او الام مش هايدو اطفالهم سجاير, خمور, مخدرات... لكن تعمل ايه لو قلتلك ان حلويات الاطفال داخل فيها مكونات مشتركة مع ال 3 حاجات اللي ذكرتهم فوق؟ ازيدك من الشعر بيت تأثير السكر والنشويات البيضاء على الاطفال مع الاستخدام المستمر يوازي اضرار التدخين! الطفل اللي بيكون سمين قبل سن البلوغ بنسبة كبيرة بعد البلوغ وباقي عمره هايعاني من السمنة والوزن الزائد! الاب و الام اللي بيربطو المكافئات واسعاد الطفل بالاكل هايخلقو مشكلة نفسية في عقل الطفل اللاواعي بالهروب من مشاكله الي الاكل في الكبر. الهروب من مواجهة المجتمع اللي بيعتبر الاب والام اللي مش بياكلو اولادهم حلويات واكل شارع ومن الكشك اهالي بخلاء وحارمين عيالهم . ربط الوزن بالصحة اكبر مصيبة لان رقم الميزان لا يدل على اي شي , في مصطلح شهير ‏Thin on the outside fat on the inside رفيع من بره وتخين من جوه. وده عنده دهون حول الاعضاء زي القلب و الكبد وغيرهم والدهون دي حرفيا بتعصر الاعضاء وبتضخ سم فيها . تخيل طفل بقى بيعاني من الدهون الحشوية وعنده امراض وهو في سن ال 11 عنده انسان بالغ في عمر ال 40 .. القرار صعب وانك تخلي طفلك مريض بايدك صعب برضه اختار الصعب بتاعك